Segunda derrota consecutiva do Peixe Galego na LEB Ouro e segundo partido que caen con claridade ante o potencial do seu rival, neste caso o Força Lleida (62-85).
A saída dos de Marín ao pavillón da Raña non facía pensar nun triunfo tan cómodo dos visitantes, xa que o Peixe dominou os primeiros instantes con intensidade e acerto para conseguir unha renda de ata 5 puntos, pero conforme pasaban os minutos esa forza foi diminuíndo.
O primeiro parcial concluíu cunha mínima vantaxe catalá (18-19), e desde ese momento o partido cambiou de cor, cun equipo local que a pesar de tentalo non acertaba ante o aro rival.
As porcentaxes de tiro baixaron (o Peixe asinou un 35% de acerto en tiros de campo por un 56% do seu rival) ao mesmo tempo que o Lleida despegaba en ataque, o que se traduciu nunha importante renda ao seu favor ao descanso (30-48).
Desde ese momento, ante un equipo marinense abatido, os visitantes controlaron o marcador e abortaron calquera intento de reacción local facendo valer o seu maior potencial e levando un merecido triunfo da Raña.
Sen tempo para lamentacións, os de Javi Llorente pensan xa na difícil saída que afrontarán este próximo venres, á cancha do Breogán de Lugo.