Broche de ouro á tempada do Pontevedra B. Tras conseguir o buscado ascenso a Preferente, o filial granate puxo a guinda á súa campaña este mércores levantando o título da Copa Deputación ao derrotar o Pontellas na final disputada no campo da Lomba, en Vilagarcía.
Despois de deixar na cuneta a Noalla (0-6), Beluso (2-1), San Martín (4-3), Moraña (1-5), Alondras (1-1 e 5-4 en penaltis) e Marcón Atlético (1-0), o Pontevedra B plantábase na final ante un duro rival, un Pontellas recentemente ascendido á Terceira División.
O campión da fase viguesa do torneo provincial comezou dominando o xogo como conxunto de superior categoría, pero malgastaron as súas ocasións ante un combativo filial. Así Berto, Javi, Nando e Cristian, nun man a man, puideron anotar antes dun descanso ao que se chegou con empate sen goles.
Os granates melloraron tras o descanso, aínda que o que chegou foi o gol do Pontellas para tomar vantaxe nunha testarada de Nando.
Véndose por detrás no marcador, o Pontevedra B lanzouse ao ataque. Primeiro avisou Iñaki con dúas ocasións, e despois Unai salvaba o empate no 74 nunha dobre oportunidade de Rivera e Hugo.
Con todo tivo que ser un dos grandes protagonistas da tempada, Rivera, o que conseguía a igualada no minuto 84, e só cinco despois chegaría o definitivo 2-1, aproveitando Guille un erro da zaga para consumar a remontada.
Descontáronse ata 7 minutos unha vez cumprido o tempo regulamentario, pero o filial soubo defenderse con orde e acerto para proclamarse campión provincial sucedendo ao Choco. Ademais do deportivo, o premio supón un engadido económico de 5.000 euros.
PONTEVEDRA B (2): Cristian; Josiño, Anxo, Pacheco, Manu Otero (Guille, min.72), Iñaki (David, min.90), Garrido, Antón, Hugo (Tavares, min.90+2), Brais (Marcos, min. 55), Rivera (Fernando, min.90+5).
PONTELLAS (1): Unai; Pablo, Elías, Antón, Dia (Rizo, min.90), Maikel, Diego Blanco (Hugo, min.65), Javi, Loito (Serxio, min.72), Berto, Nando (Iago, min.65).
Árbitro: Tomás Balboa. Amoestou a Garrido e Cristian no Pontevedra B e a Serxio no Pontellas.
Goles: 0-1 (min. 52), Nando. 1-1 (min.84), Rivera. 2-1 (min.88), Guille.
Incidencias: A Lomba, Vilagarcía de Arousa.