O Pontevedra Club de Fútbol decidiu organizar unha viaxe para que os seus afeccionados poidan estar presentes o vindeiro domingo (17:00 horas) en Palencia arroupando ao equipo no estadio da Nueva Balastera.
O club granate fretará un autobús que partirá o mesmo día do partido, ás 6:45 horas, desde as inmediacións do Fondo Sur de Pasarón, regresando tras o partido.
O prezo da viaxe fixouse en 12 euros por afeccionado, entrada incluída, sendo de balde tanto o desprazamento como o acceso ao campo para os menores de 15 anos.
As persoas interesadas poden anotarse nas oficinas do Estadio Municipal de Pasarón ata o medio día do venres, en horario de 9:00 a 14:00 e de 16:00 a 19:00 horas. A entidade seguirá de maneira rigorosa a orde de inscrición ata completar as prazas dispoñibles.
A impulsada polo club será a única viaxe organizada de afeccionados a Palencia, tras suspenderse a expedición promovida por un grupo de seguidores co patrocinio económico do grupo opositor ao Consello de Administración.