Despois dun bo inicio de liga, con empate fóra da casa ante o Guijuelo e triunfo claro ante o Mutilvera en Pasarón, o Pontevedra prepárase xa para render visita a un dos campos máis complicados da categoría, o do sempre favorito Real Racing Club de Santander.
O club cántabro tamén acumula catro puntos tras as dúas primeiras xornada de liga e chegará á cita con todo o seu arsenal dispoñible, a excepción do centrocampista Álvaro Peña, expulsado a pasada fin de semana en Vigo ante o Celta B.
O ex-técnico granate Ángel Viadero, agora no banco do Sardinero, poderá contar co seu novo dianteiro, o andaluz Caye Quintana, presentado este luns como xogador do Racing procedente do filial do Real Valladolid. Unha incorporación que fai contar aos de Santander con "un equipo equilibrado y compensado", sinalou Viadero.
Tamén o Pontevedra acudirá a Santander con todo o seu equipo dispoñible, xa que salvo contratempo durante a semana a enfermería está actualmente baleira.
Os granates, que este martes contan con xornada de descanso, volverán o mércores aos adestramentos para preparar o choque do próximo domingo (19:00 horas) nos Campos de Esport de El Sardinero.