Coincidindo coa celebración dunha feira de artesanía organizada pola Asociación Marinense de Artesás, na que se recolleron tapóns e alimentos non perecedoiros con fins benéficos, o Club Rebouras Team aproveitou a ocasión para achegar o seu labor aos marinenses.
En plena Alameda, o club puxilístico organizou o domingo 17 de maio o I Trofeo Vila de Marín de boxeo infantil.
Neste participaron nenos dende os 6 aos 14 anos nun total de catro categorías.
A xornada pechouse ademais cunha exhibición do equipo elite masculino e feminino que a próxima fin de semana disputará en Murcia os Campionatos de España de Boxeo.
Tratouse dunha acción organizada coa intención cambiar a imaxe agresiva do boxeo "por valores do deporte como compañeirismo, nobreza, humildade e respecto", sinalaron dende o Rebouras Team.