O 2022 comezou para o Tenis de Mesa Monte Porreiro cun meritorio empate en liga na visita do Arteal santiagués ao pavillón da Cidade infantil Príncipe Felipe, aínda que os pontevedreses quedaron co mel nos beizos.
Os pupilos adestrados por Nando Álvarez puxeron contra as cordas ao segundo clasificado do seu grupo na Superdivisión masculina, ao empezar dominando o enfrontamento 2-0 cos triunfos de Nico Galvano e Martín Bentancor sobre José Mendes e Humberto Manhani respectivamente.
O Arteal recortou distancias co triunfo de André da Silva sobre Ilia Isakov, pero Martín Bentancor no duelo máis emocionante do día conseguía o 3-1 ao superar a José Mendes deixando ao seu equipo a un paso da vitoria.
Tiña o Monte Porreiro dúas opcións para pechar o enfrontamento ao seu favor, pero reaccionou o conxunto santiagués para poñer as táboas (3-3) e forzar a repartición de puntos.
Tras este resultado o equipo pontevedrés segue terceiro no seu grupo ligueiro con 5 puntos, a 2 do propio Arteal que é segundo, e con 3 puntos de vantaxe sobre o seu próximo rival, o San Sebastián de los Reyes.