Tras nove anos ligado á SD Teucro, Carlos García abandona o equipo pontevedrés. Así o anunciou este luns o club, que avanzou que se lle renderá unha merecida homenaxe.
O extremo esquerdo de Carballo, un dos xogadores máis queridos pola afección, explicará mañá en rolda de prensa os motivos polos que marcha do Teucro.
O ata agora capitán teucrista chegou á disciplina azul no verán de 2009, procedente do Club Balonmano Cisne, onde militara unha tempada chegado desde o Xiria.
Desde o primeiro momento Carlos García converteuse nun home importante para a SD Teucro ata converterse no capitán e icona dun equipo que nas últimas tempadas conseguiu dous ascensos á liga Asobal.
Nesta última tempada, marcada para el por unha lesión no pé, meteu 86 goles e tivo un rol importante na permanencia lograda polo equipo de Quique Domínguez.
Desde o club quixeron transmitir o máis profundo agradecemento a Carlos García e deséxanlle moita sorte no seu futuro, deixando as portas abertas nunha nova etapa.
Engade Pontevedra Viva como fonte preferida de Google de balde
Mantente informado coas últimas noticias de actualidade.