O Academia Octavio converteuse nos últimos anos no principal foco de fichaxes para o Teucro. Desde o seu adestrador, Quique Domínguez, pasando por xogadores como Dani Hernández ou Edu Moledo chegaron ao club azul desde o cadro vigués nas pasadas campañas.
Esta situación acentuouse este verán, xa que tres dos catro fichaxes teucristas chegaron polo momento desde a cidade veciña. O último en aterrar en Pontevedra é o pivote ourensán Juan Quintas, confirmado este martes como novo xogador do Teucro para as dúas próximas campañas.
Segue así o camiño que marcaron os seus compañeiros Lloria e Borja Méndez, fichaxes das últimas semanas cuxa lista completa Saúl Campo, procedente do Go Fit Sinfín.
Juan Quintas "é novo, galego, e ten moitas ganas de xogar no Teucro para seguir evolucionando como xogador", declarou Quique Domínguez sobre o seu novo pupilo. O pivote, de só 20 anos, xogou as dúas últimas campañas na División de Honra Prata co Octavio.