Positiva experiencia para o Club Waterpolo Pontevedra no Campionato de España de 3ª División disputado nas instalacións do Club Natació Montjuic.
Os pontevedreses finalizaron nunha meritoria quinta posición, con dúas derrotas e tres vitorias, na que tamén supoñía fase de ascenso á Segunda División nacional.
Oito equipos participaron na competición. Os xogadores do Waterpolo Pontevedra debutaron con senllas derrotas ante os potentes CN Rubí (15-5), filial do equipo de División de Honra, e Hospitalet (16-3). Despois repuxéronse para xogar ante equipos de nivel similar ao seu gañando a Albacete (6-7), CW Navarra (11-7) e CD Fortuna (9-10).
Cinco partidos en tres días que serven para medir o nivel dun equipo en progresión e que aspira a seguir crecendo. A Nivel individual ademais, o pontevedrés Andrés Villaverde foi o terceiro máximo goleador do torneo.
CAMPIONATOS GALEGOS EN PONTEVEDRA
O vindeiro sábado 21 de maio a piscina do Centro Galego de Tecnificación Deportiva de Pontevedra acollerá os primeiros campionatos galegos de verán coa celebración do Benxamín Mixto e Cadete Feminino.
O Campionato Galego Benxamín Mixto contará coa participación de 3 equipos galegos: RCN Vigo, CW Santiago e CW Pontevedra. Pola súa banda no cadete competirán os catro equipos que xogaron a liga: RCN Vigo, CW Santiago, Asociación Coruñesa e CW Pontevedra.
Os partidos xogaranse en xornada de mañá e tarde, de 11:30 a 13:30 horas e de 16:30 a 20:00 horas.