Gran despedida para o piragüismo pontevedrés na última xornada do Campionato do Mundo de Piragüismo Maratón, que se pechaba este domingo na localidade húngara de Györ.
A grovense Tania Álvarez (Breogán) proclamouse campioa do mundo xunto á súa compañeira no K-2, Tania Fernández.
Fíxoo nunha vibrante regata de 25 quilómetros de percorrido que se decidiu no spritn final.
A parella española entrou en meta cun tempo de 1:51:26.22, tras case dúas horas de esforzo, e superando en só 0.89 segundos as húngaras Zsofia Zserafin e Vanda Kiszli, e en apenas 2.67 segundos ás tamén húngaras Panna Sinko e Panna Csepe, que levaron a prata e o bronce respectivamente.
Un ouro mundial celebrado ao grande ao cruzar a meta, como ben merece a fazaña conseguida.
Pero non foi o único metal pontevedrés na última xornada do Mundial, e é que Jaime Duro, que colgou o ouro na proba curta de canoa, fixo dobrete cunha brillante medalla de prata no C-2, facendo dupla con Manuel Garrido.
Na súa proba os grandes dominadores foron os portugueses Ricardo Coelho e Rui Lacerda (1:35:45.63).
Segundos entraron en meta a 49.33 segundos Duro e Garrido, castigados por dúas sancións dos xuíces que lles privaron de pelexar polo triunfo final, pero con case un minuto de vantaxe á súa vez sobre a embarcación que levou o bronce, a dos polacos Mateusz Zuchora e Mateusz Borgiel.