O último adestramento previo á viaxe cara a terras canarias non trouxo as mellores noticias para o técnico do Pontevedra, Manu Fernández, que se encontrou co contratempo de non poder contar co centrocampista Pedro Crespo, quen, tras estar toda a semana ausente dos ensaios a consecuencia de problemas abdominais, concretamente na zona da pube, non puido recuperarse a tempo, e causará baixa para o partido de volta fronte ao Atlético Granadilla.
Deste modo, Pedro Crespo únese ás baixas xa previstas de Caco e Luismi, que tampouco están en condicións de xogar, o que levou ao técnico granate a levarse a Tenerife a 17 xogadores, dando entrada na lista de convocados a Pablo Lede e David García, que son as novidades con relación ao partido de ida, e co fin de contar con máis efectivos na zona ancha do terreo, aínda que deberá efectuar un descarte moi posiblemente no mesmo campo Francisco Suárez.
Os granates realizaron a última sesión preparatoria antes do desprazamento na tarde do venres, no sintético da Xunqueira. Alí recibiron tamén a visita do presidente, José Manuel Fernández, quen acompañará ao equipo ata Granadilla de Abona, se ben realizando a viaxe á parte do grupo. O máximo mandatario aproveitou para intentar transmitir os xogadores tranquilidade e confianza no seu traballo, animándoos para regresar coa clasificación para a última eliminatoria no peto.
Concluída a sesión, o técnico facilitou a lista de xogadores convocados para o partido, que como reflectimos está formada por 17 xogadores: Edu, Paco, Adrián, David Feito, Pablo, Miguel, Yago Vázquez, David García, Kevin Presa, Pablo Lede, Fran Fandiño, Tubo, Moreira, David Pérez, Benja, Kevin Levis e Pablo Carnero.
Quedan fóra, ademais dos xa citados Caco, Luismi e Pedro Crespo, por lesión, Tomas e Javi Otero, por decisión técnica.
A expedición granate parte a primeiras horas do sábado cara a Tenerife, con escala en Madrid, tendo prevista a súa chegada o hotel de concentración na localidade de San Isidro, pouco despois do mediodía, para despois de comer e descansar realizar un lixeiro adestramento no campo do Raqui San Isidro.
A pesar da distancia, agravada polas dificultades engadidas polo atraso ao fixar a data e hora do partido, o Pontevedra non estará só en tan importante cita, xa que ademais dalgúns afeccionados que se encontran na illa de vacacións e que manifestaron a súa intención de acudir ao partido, tamén o farán membros do Centro Galego de Tenerife, presidido polo pontevedrés Eduardo Sánchez Solla, que igualmente fixeron pública a súa intención de estar presentes apoiando aos granates.