A volta aos adestramentos no Pontevedra Club de Fútbol estivo marcada este luns polos problemas físicos que arrastran varios dos seus futbolistas.
O empate conseguido en Xixón trouxo consigo varios lesionados na expedición granate.
O que máis preocupa é Kevin Presa, que acabou o partido con molestias musculares e no primeiro adestramento da semana exercitouse á marxe dos seus compañeiros.
Con todo as súas sensacións non son tan negativas como se pensaba nun principio e a súa participación en Vigo, aínda que é dubidosa, non está descartada e dependerá da evolución dos próximos días.
Tamén regresou tocado Pablo, que tivo que ser cambiado ante o Sporting B pero que adestrou este luns con normalidade.
Con todo non todo son malas noticias para Luisito, que comprobou en Príncipe Felipe a boa evolución de Jacobo, practicamente recuperado dos seus problemas musculares, e de Miki, que tamén se exercitou co resto do grupo.
O xogador que está descartado para o choque do sábado ante o Celta B é Tomás, que segue recuperándose da súa lesión de pube, mentres Capi, que iniciou o adestramento co grupo, segue a menor ritmo e terminou facendo carreira continua ao persistir as molestias que xa lle impediron viaxar a Asturias.
AUTOCAR DE AFECCIONADOS A VIGO
Pensando no partido do sábado (16:15 horas) no municipal vigués de Barreiro ante o Celta B, o Pontevedra anunciou que poñerá un autocar a disposición dos seus afeccionados para poder acudir ao encontro.
A viaxe terá un custo de cinco euros máis o prezo da entrada e sairá do Pavillón Municipal dos Deportes ás 15:00 horas do sábado.
Os interesados poden anotarse nas oficinas que o club ten en Pasarón en horario de oficina ata as 14:00 horas do próximos venres.