O Pontevedra Club de Fútbol está a só un paso de pechar a súa presenza no play-off de ascenso a Segunda División. Teno ao seu alcance a tres xornadas para o final e tres puntos (máis o average) de vantaxe sobre os seus inmediatos perseguidores.
Por iso, con dous dese tres partidos na casa, "o play-off pasa por Pasarón", aseguran desde a entidade granate na busca de lograr o maior apoio posible nun momento de gran ilusión.
O primeiro deses partidos xogarase este mesmo sábado 9 de maio (16.15 horas) fronte ao Bilbao Athletic no Estadio Municipal de Pasarón.
É o momento da verdade e desde o Pontevedra decidiron botar o resto con prezos populares para encher as bancadas.
En concreto a entidade da Boa Vila rebaixou os prezos das entradas, con billetes a 10 euros nas bancadas de Tribuna e Preferencia e de 5 euros nos fondos.
Trátase esta vez de entradas de categoría única, tanto para maiores como menores de idade, fóra dos menores de 6 anos que seguirán contando con acceso de balde.
Informa o Pontevedra que as localidades poden adquirirse online ou en venda anticipada nas oficinas de Pasarón de luns a venres en horario de 9.00 a 14.00 e de 16.00 a 19.00 horas.
Os despachos de billetes do estadio abrirán pola súa banda o día de partido ás 15.15 horas.
🎟️ 𝑬𝑵𝑻𝑹𝑨𝑫𝑨𝑺 | O 𝒑𝒍𝒂𝒚𝒐𝒇𝒇 pasa por Pasarón 🦴
— Pontevedra CF 🦴 (@PontevedraCFSAD) May 5, 2026
👉Entradas por 5€ para Fondo Norte e Fondo Sur
👉10€ para Preferencia e Tribuna
Enchamos Pasarón‼️#𝐆𝐑𝐀𝐍𝐀𝐓𝐄 ♥️#PrimeraFederacion | #VersusELearning pic.twitter.com/AyXKdUh5ew