Pouco máis dun mes para que Combarro sexa saída dunha etapa de La Vuelta a España, e o goberno local avanzan nos preparativos do dispositivo de organización e seguridade da proba.
"Será unha xornada para lembrar", asegura o alcalde, Ángel Moldes.
O Concello mantivo este luns 4 de agosto unha reunión de coordinación con representantes da empresa Unipublic, organizadora de La Vuelta, para ultimar os detalles da xornada ciclista, prevista para o martes 9 de setembro.
No encontro abordáronse todas as cuestións técnicas necesarias para a montaxe e desmonte de todo o operativo, desde a zona de saída ata os espazos reservados para aparcadoiros de equipos, organización ou a caravana publicitaria.
Será a primeira vez que Poio acolla unha saída de etapa dunha das maiores carreiras ciclistas do calendario internacional, unha carreira que obriga a un gran esforzo organizativo ao supor a mobilización de 184 cilistas, 46 vehículos de equipos e un amplo dispositivo de seguridade.
"Trátase dunha oportunidade histórica para Poio, tanto a nivel deportivo como promocional, xa que La Vuelta é unha fiestra internacional que permitirá amosar a beleza e potencial do noso concello ao mundo", afirma o alcalde.
Por ese motivo, Moldes fai un chamamento animando "a todos os veciños e veciñas a participar, a vivir esta festa do deporte e a encher as rúas para dar unha calorosa benvida aos corredores".
Na reunión, ademais do rexedor, participaron con concelleiros de Deportes e Seguridade Cidadá, Tucho Muíños e Maritxe González; o director de produción e loxística de La Vuelta, Pedro Lezaun; o responsable de montaxe da saída, Kerman Zunzarren; e o patrón maior da Confraría de Raxó, Iago Tomé.
Ademais da propia etapa, a presenza de La Vuelta en Poio farase notar un día antes, o luns 8 de setembro, coincidindo coa xornada de descanso da carreira ciclista.