Os dous equipos pontevedreses de Primeira División, o Poio Pescamar e o Marín Futsal, xa coñecen aos rivais aos que terán que enfrontarse no seu primeiro duelo na Copa Galicia feminina de fútbol sala. Ambos empezarán a competir nos cuartos de final.
O Viaxes Amarelle será o equipo co que debutará o Poio Pescamar en partido oficial esta tempada, tras cinco semanas de preparación.
Esta eliminatoria de cuartos de final xogarase na Coruña o sábado 9 de setembro, a partir das seis da tarde, segundo informan desde o club.
O Marín Futsal, pola súa banda, xogará contra o Mosteiro Bembrive de Vigo, equipo da Segunda División, que derrotou na fase previa ao Cidade de As Burgas por 0-2.
A falta de confirmación oficial, todo apunta a que este choque se disputará tamén o sábado 9 de setembro, a partir das 19:30 horas, na pista do conxunto olívico.