Máis dun mes vai estar sen competir o Poio Pescamar ante o que é o primeiro Campionato do Mundo FIFA da historia do fútbol sala feminino.
A cita mundialista, que comeza o próximo 21 de novembro en Filipinas, provocou o parón da Primeira División nacional na que milita o conxunto conserveiro.
As xogadoras vermellas chegaron ao mesmo ademais tras un gran inicio de curso, como único equipo invicto e na segunda posición do campionato ligueiro, a 3 puntos do líder Melilla.
O equipo da cidade autónoma será precisamente o primeiro rival cando regrese a liga, a domicilio, o próximo 13 de decembro.
Mentres tanto Luís López-Tulla seguirá afinando a preparación do seu equipo, aínda que o fará coa metade do seu plantel ausente polo Mundial, xa que sete das súas futbolistas foron convocadas polas súas respectivas seleccións: A gardameta Elena, Noelia Montoro, Ale de Paz e Martita defenderán a España se pasan o último corte na Selección, Carolina Pedreira e Débora Lavrador viaxarán a Filipinas con Portugal e Rafa Pato farao con Italia.
O resto do equipo seguirá adestrando na casa, aínda que se lles deu uns días de descanso ás xogadoras, que non volverán exercitarse até o 12 de novembro.
Durante este tempo, e para non perder a forma, o Poio Pescamar confirmou que disputará dous encontros amigables.
O primeiro deles terá lugar o 20 de novembro na pista do Ourense Ontime (20.00 horas).
Pola súa banda unha semana despois, o 27 de novembro, o rival será o Burela nun partido que se disputará no pavillón da Seca (18.00 horas).
Engade Pontevedra Viva como fonte preferida de Google de balde
Mantente informado coas últimas noticias de actualidade.