'Este momento é para todos, sumar'. É o suxestivo slogan co que o Pontevedra CF activou a súa campaña de abonados para a segunda volta da tempada.
Seguir aumentando o número de socios e lograr que Pasarón arroupe ao equipo granate no que resta de competición son os obxectivos que se marcou o club.
Esta campaña foi anunciada este martes a través das redes sociais.
"Non perdas a oportunidade de vivir nós esta tempada, porque non é o mesmo que cho conten que vivilo", afirma a entidade na súa promoción.
Ademais de anunciar o arranque desta nova campaña de abonos, o Pontevedra quixo confirmar os prezos que pagarán estes novos socios.
Así, oscilarán entre os 40 euros que pagará o público infantil en Fondo Sur, Fondo Norte e Preferencia (45 euros en Tribuna) e os 160 euros do abono adulto en Tribuna.
Os mozos deberán abonar 60 euros (65 en Tribuna) e o resto dos prezos para os adultos sitúanse nos 90 euros para Fondo Norte e Fondo Sur e nos 120 para a bancada de Preferencia.
Estes abonos permitirán asistir aos dezanove partidos que lle quedan ao primeiro equipo en Primeira RFEF e a calquera dos que xoguen como local os conxuntos das categorías inferiores e de base.
Os novos abonados poden xa retirar o seu carné de socio nas oficinas de Pasarón.