O Pontevedra confía en Tiago Rodríguez para a próxima tempada

Tiago Rodríguez seguirá vinculado ao Pontevedra Club de Fútbol durante, polo menos, unha tempada máis.

O ourensán renova co club granate até 2027 coa intención de terminar a súa recuperación e volver canto antes aos terreos de xogo.

O da cidade termal foi sen dúbida un dos grandes nomes propios do conxunto granate na primeira metade do campionato. Foi clave na mellor serie de vitorias que atravesou o equipo e o seu entendemento co resto de compañeiros era total.

Pero todo torceuse o 31 de xaneiro no Estadio El Prado no encontro contra o CF Talavera que finalizou con vitoria granate por 0-4. Os granates golearon e convenceron, pero perderon a un dos xogadores máis importantes para o resto da tempada.

E é que as probas confirmaron días despois que o ourensán sufrira unha rotura do ligamento cruzado do seu xeonllo esquerdo, mesma lesión que sufriu o seu compañeiro de equipo Juanra poucos meses antes.

A súa ausencia non pasou desapercibida, pois o equipo de Rubén Domínguez atravesou unha xeira de sete xornadas consecutivas sen coñecer a vitoria xusto tras a súa lesión. Casualidade ou non, o Pontevedra botoulle en falta.

As mellores obras non explícanse.
Revélanse. 🎨❤️

~ 𝑻𝑰𝑨𝑮𝑶 𝟐𝟎𝟐𝟕 ~#OndeOLerezFaiHistoria pic.twitter.com/MRxLIiCkkT

— Pontevedra CF 🦴 (PontevedraCFSAD) July 13, 2026

É por iso que o club volve apostar polo xogador, que continúa recuperandose seis meses despois e cuxa data para volver aos terreos de xogo é aínda unha incógnita.

Domínguez non poderá contar con el desde o inicio da tempada pero, en caso de recuperar a súa mellor versión, será sen dúbida un dos xogadores a ter en conta no conxunto granate.

Xa só queda por coñecer o futuro de Brais Abelenda no que respecta aos xogadores que terminaron contrato en xuño de 2026 e cuxa situación non foi aínda comunicada polo club.

Salvo sorpresa de última hora, Rubén Domínguez contará con 17 xogadores con ficha do primeiro equipo para a primeira sesión de adestramento da pretemporada programada para este mércores.

Entre eles atópanse sete novos fichaxes (Jerín, Adrián Argos, Ilías Charid, Iker Ivorra, Iñaki Elejalde, Domingo Mba e Iker Galindo), cinco renovados (Álex González, Alberto Gil, Juanra, Álvaro Pérez e Tiago) e cinco xogadores con contrato desde a pasada campaña (Marqueta, Vidorreta, Expósito, Yelko e Compa).