Mirando ao ceo. Así estarán até o domingo Pontevedra Club de Fútbol e CD Numancia ante o duelo polo liderado da Segunda RFEF que se vivirá no Estadio Municipal de Pasarón (17.00 horas).
A climatoloxía pode xogar un papel importante no duelo, sobre todo polo estado no que quedou o céspede do estadio pontevedrés tras o choque contra o Compostela e as choivas dos últimos días.
De feito durante toda a semana, e aínda este mesmo venres, os operarios encargados do coidado do terreo de xogo levaron a cabo constantes coidados para tentar que presente o mellor aspecto posible.
Neste sentido, a preocupación chega agora polas previsións que os servizos de meteoroloxía avanzan para o vindeiro domingo 26 de xaneiro.
De feito a Axencia Estatal de Meteoroloxía (AEMET) activou a alerta amarela pola acumulación de choiva e vento nas Rías Baixas.
En concreto, segundo a AEMET, espéranse entre as 6.00 horas e o final da xornada acumulacións de até 60 litros por metro cadrado e refachos de vento que poden chegar aos 80 quilómetros por hora.
"Localmente pódense alcanzar máis de 100 litros en 24 horas", alerta a axencia estatal no seu aviso oficial.
Son de momento predicións, pero o que dan por seguro tanto a Axencia Estatal de Meteoroloxía como Meteogalicia é que choverá durante a xornada do domingo.