O Pontevedra pon fin á mala serie cunha meritoria vitoria fronte ao Barakaldo en Pasarón

Este sábado chegou, ao fin, a vitoria que puxo fin á serie de sete xornadas consecutivas sen gañar para o conxunto de Rubén Domínguez. E é que o Pontevedra se impuxo por 2-0 ao Barakaldo no Municipal de Pasarón nun grandísimo partido dos granates. Compa fixo o primeiro tanto na primeira parte e Joao sentenciou no tempo de desconto.

Moitas novidades nun once inicial do Pontevedra condicionado polas baixas de Alain e Brais Abelenda, ambas as dúas por sanción, e polo regreso de Yelko Pino tras perder o encontro da xornada pasada por acumulación de cartóns.

Apostou Rubén Domínguez por Marqueta en portaría, o centro da zaga foi para Montoro e Álvaro Pérez, Vido volveu ao lateral dereito e Miguel Cuesta actuou no lateral esquerdo. Facu foi a gran novidade no dobre pivote xunto a Yelko, Luisao volveu á titularidade para partir no extremo dereito, Alberto Gil no esquerdo e Diego Gómez xogou por dentro como mediapunta. Compa, como sempre, foi o máis adiantado do ataque granate.

A primeira nota positiva do encontro chegou no sorteo inicial que Yelko volveu gañar tras varias semanas sen facelo. Os granates, que comezaron atacando cara a fondo sur, protagonizaron un arranque de partido moi serio aínda que sen ocasións nos primeiros minutos.

O céspede luciu un mellor aspecto grazas ao bo tempo das últimas semanas, o que permitiu un xogo máis combinativo do conxunto granate, que buscou asociarse con xogadores como Diego Gómez e Luisao para abrir ocos na zaga vasca.

▶️ Comeza ou encontro en Pasarón!#𝐆𝐑𝐀𝐍𝐀𝐓𝐄®️♥️#PontevedraCFBaraka #PrimeraFederacion | #VersusELearning pic.twitter.com/Psab9qYFRG

— Pontevedra CF 🦴 (PontevedraCFSAD) April 4, 2026

Non tardou en chegar a primeira polémica do encontro. No minuto 22, Yelko asociouse con Compa, que cun rebote logrou filtrar un balón ao espazo a Luisao. O xogador cedido polo RC Deportivo gañoulle as costas a Oier López e bateu a Gaizka cunha gran definición. Con todo, o colexiado pitou falta do xogador granate sobre o defensa do Barakaldo.

O árbitro aragonés foi chamado para ver unha revisión na que se aprecia, claramente, que Luisao leva o balón de forma limpa sen cometer falta. Incomprensiblemente, Alfredo Ramo mantivo a súa decisión de anular o gol do Pontevedra. Non quedou aí a polémica, xa que o técnico do cadro lerezano foi expulsado posteriormente por unha presunta protesta.

A pesar do contratempo, os granates mantiveron o gran xogo que estaban a despregar até o momento. De feito, un gran centro de Miguel Cuesta desde o perfil esquerdo estivo a piques de supor o 1-0. Compa deixou pasar o coiro e Huidobro estivo salvador para o conxunto vasco, pois despexou o esférico cando Diego Gómez xa se preparaba para recibilo só no punto de penalti.

O Pontevedra merecía o gol e o premio chegou no minuto 37 tras unha gran xogada combinativa. Recibiu o balón Yelko, que puxo de primeiras un pase ao espazo en banda dereita. Luisao chegou a liña de fondo para sacar un centro raso que Compa rematou no primeiro pau para, esta vez si, facer o 1-0 tras un gran primeiro tempo do equipo.

Xestionou a vantaxe á perfección o conxunto lerezano, que non deu un paso atrás e terminou o primeiro tempo axexando constantemente a área do conxunto vasco. Sinalou o final da primeira metade o colexiado aragonés tras catro minutos de engadido.

😇 O PontevedraCFSAD xoga COMO LOS ÁNGELES!

♻️ 𝙂𝙧𝙖𝙣 𝙟𝙪𝙜𝙖𝙙𝙖 𝙖𝙨𝙤𝙘𝙞𝙖𝙩𝙞𝙫𝙖 que finaliza Alexcompa9.

📺 LaLigaPlus e MPlusDeportes #PontevedraCFBaraka | #PrimeraFederación | #VersusELearning pic.twitter.com/l7IaKTPdQ1

— Primeira Federación Versus e-Learning (Primeira_RFEF) April 4, 2026

Imanol de la Sota moveu o banco visitante cun triplo cambio no descanso. Sabin Meiriño, Deje e Mandiang entraron no sitio de Huidobro, Oier López e José de León. Todo seguiu igual no once do Pontevedra.

O cadro vasco saíu enérxico ao segundo tempo e axexou con perigo a área de Marqueta nun centro desde o segundo pau de Pedernales que Montoro puido desviar a saque de esquina.

Compa viu a primeira amoestación por parte do conxunto granate no minuto 56 por un encontrón con Dufur, que foi sancionado da mesma forma que o de Pontecesures.

Aos poucos gañou terreo de novo o equipo de Rubén Domínguez, que ameazou a portaría de Gaizka nunha combinación de Alberto Gil e Miguel Cuesta pola esquerda que terminou en saque de esquina. Contestou o Barakaldo cun testarazo de Sabin Meirino que se foi desviado por moi pouco.

Un dos grandes protagonistas do encontro, Luisao, foi substituído no minuto 64. O xogador granate, partícipe no primeiro tanto ao dar o pase de gol, deixou o seu sitio para dar entrada a Joao Resende. De feito, o portugués foi protagonista nada máis entrar ao terreo de xogo.

En primeiro lugar, por peitear un balón no primeiro pau que Álvaro Pérez rematou no segundo para forzar a parada de Gaizka. Un minuto despois, Resende plantouse só, pero forzado, na área do Barakaldo tras unha longa condución. Aínda que driblou o meta rival cun gran recorte, a zaga visitante chegou para frustrar a ocasión dos locais.

Entraron Álex González e Rubén López a quince minutos do final para achegar frescura ao equipo de Rubén Domínguez, que cedeu terreo ao conxunto vasco co paso dos minutos. Continuaron as chegadas do Barakaldo cun novo centro lateral que despexou Álvaro Pérez a saque de esquina.

Entrou o encontro no dez últimos minuntos co Pontevedra ben asentado, pero coa incerteza de ter soamente un gol de vantaxe no marcador. Os de Imanol de la Sota esgotaron as súas permutas coa entrada de Valiño no minuto 81.

Foi de feito Valiño quen tivo a máis clara para o Barakaldo a seis minutos da conclusión. Mandiang asociouse con el cun pase de cabeza no segundo pau e o xogador visitante, só e na área pequena, mandou o seu disparo desviado á dereita da portaría de Marqueta.

Adrián Abalo, que dirixiu o equipo desde a expulsión de Rubén Domínguez, meteu a Víctor Eimil para dar saída a un Facu Ballardo que asinou un gran encontro.

O Pontevedra puxo en práctica un auténtico exercicio de resistencia nun tramo final alongado durante os tres minutos de tempo engadido. A última ocasión para os visitantes chegou no minuto 92 nunha falta lateral que, con todo, supuso a sentenza do conxunto granate co definitivo 2-0.

E é que o meta do Barakaldo, Gaizka, subiu a rematar un centro que Marqueta despexou de puños. Álex González cazou o rexeite e deulle un pase ao oco a Joao Resende, que conduciu só e definiu coa portaría baleira para facer o gol da sentenza (2-0).

Non houbo tempo para máis tras a reanudación e o Pontevedra puxo fin á serie de sete xornadas sen gañar cunha meritoria vitoria fronte a un rival directo como é o Barakaldo. Os de Rubén Domínguez engánchanse de novo aos postos de play-off a pesar de ter un partido menos, que disputarán este mércores contra o Arenas Club de Getxo no campo de Fadura (19.00).

PONTEVEDRA CF (2): Marqueta, Álvaro Pérez, Yelko, Miguel Cuesta, Facu Ballardo (Víctor Eimil, min. 85), Vidorreta, Luisao (Joao Resende, min. 64), Alberto Gil (Álex González, min. 74), Diego Gómez (Rubén López, min. 74), Compa e Montoro.

BARAKALDO CF (0): Gaizka, Dufur, Pedernales, Huidobro (Sabin Meiriño, min. 46), Muñoz (Eric, min. 64), Castelo, Oier López (Deje, min. 46), José de León (Mandiang, min. 46), Galarza (Valiño, min. 81), Álvaro Peña, Roupeiro.

Árbitro: Alfredo Ramo (Aragón), auxiliado nas bandas por Jon Martínez e Pelayo Corgo, con Alberto Lago como cuarto colexiado. Amoestou a Compa (56´) e Marqueta (90´) por parte do Pontevedra e a José de León (42´), Álvaro Peña (47´) e Dufur (56´) por parte do Barakaldo. Tamén expulsou a Rubén Domínguez (24´) por parte do Pontevedra.

Goles: 1-0, Compa, min. 37. 2-0, Joao Resende, min. 92.

Incidencias: Partido correspondente á xornada 31 do grupo I de Primeira RFEF disputado no Municipal de Pasarón diante de 2.890 espectadores.