A situación actual do Pontevedra CF resulta apetecible para moitos grupos investidores que están a entrar no mundo de fútbol.
Así se desprende dalgunhas das explicacións dadas pola presidenta da entidade Lupe Murillo, aos accionistas na Xunta Xeral Ordinaria celebrada este luns no Estadio Municipal de Pasarón.
E é que cunha débeda contida que a 30 de xuño deste ano era de 818.347 euros e ao tratarse dun club con respaldo social e potencial dunha capital de provincia, moitos preguntaron pola posibilidade de facerse cun paquete maioritario de accións.
"Todos os anos aparece xente que nos quere comprar o club", recoñeceu a máxima dirixente granate no apartado de rogos e preguntas da Xunta.
"É unha vantaxe e unha sorte saber que temos un club que á xente lle pode interesar. Nós chegamos aquí e non o quería ninguén", defendeu Murillo.
De feito a presidenta profundou no asunto asegurando que "houbo conversas e fixéronme propostas, algunha potente".
Unha desas propostas cualificadas como "interesante, de xente de fóra" foi "a última oferta que era de capital americano e se me fai desde Suíza, con investidores que teñen equipos en Portugal en Primeira División", revelou.
Con todo, e tras lembrar situacións de investidores estranxeiros que non saíron do todo ben "en Murcia ou Cartaxena", ou tamén unha das máis actuais co "Brentford no Mérida" que non lle acaban de convencer, no caso do Pontevedra "de momento nós recibimos ofertas de compra pero non as valorei", resolveu Lupe Murillo ante os accionistas preguntándose "que sentido tería pór o club en mans de calquera que veña por aquí".