Se na primeira xornada do Campionato de España Absoluto de Inverno de Natación non se produciron grandes marcas para as deportistas pontevedresas en competición, o segundo día en Barcelona resultou máis produtivo.
Bea Gómez Cortés, agora nas filas do Sabadell, meteuse na final dos 400 estilos despois de fixar unha marca de 4:46.00 en horario matinal. Xa pola tarde mellorou o seu rexistro e cun tempo de 4:43.63 asinou un quinto posto na loita polas medallas.
A vencedora nesta proba foi África Zamorano (4:35.29), con Catalina Corró en segundo lugar (4:38.85) e Jimena Pérez no terceiro (4:40.31).
Tamén competiu na segunda xornada do Nacional de Piscina Curta a pontevedresa Clara Otero, do Galaico, sendo sexta na súa serie dos 100 libre (58.42) e oitava na súa serie das 50 costas (30.35), en ambos os dous casos sen conseguir avanzar á final.
O campionato empezara o xoves con Bea Gómez participando nos 400 libre, Clara Otero nos 100 estilos e Carla Goyanes na 100 bolboreta, sendo quinta na súa serie (1:04.61).
A competición na Piscina Nova de l'Escullera de Barcelona prolongarase ata o vindeiro domingo 26 de novembro.