Era un partido entre necesitados e terminou cun resultado que de pouco serve aos dous. Ribadumia e Bergantiños buscaban escapar da zona de perigo e acabaron repartindo puntos, nun choque de alternativas no que puido gañar calquera e que deixa aos dous equipos inmersos nos postos baixos da clasificación.
Os locais adiantábanse aos 25 minutos ao transformar Changui un penalti, pero o Bergantiños daría a volta ao marcador con dous goles de Álex Pérez, o primeiro pouco antes do descanso (minuto 44) e o segundo pasada a hora de xogo (minuto 54).
Con todo en contra, o Ribadumia foise arriba e conseguiu polo menos salvar un punto cun remate de Aram (minuto 73), que lle permite manterse fóra dos lugares de descenso, pero cos mesmos puntos que Órdenes e Noia e só un máis que o seu rival desta ocasión, o Bergantiños, e o Ribadeo, que son os catro equipos que pechan a táboa de posicións.