O Complexo Deportivo Rías do Sur acaparará este sábado, 6 de decembro, toda a atención da natación autonómica coa celebración do Campionato Galego de Longa Distancia, unha cita que reunirá a boa parte das novas promesas deste deporte.
A competición, organizada pola Federación Galega de Natación (FEGAN), contará coa presenza de 98 nadadores pertencentes a 16 clubs de toda Galicia, o que garante unha xornada intensa e de alto nivel.
A sesión matinal reservarase ás probas de 2.000 metros libres nas modalidades masculina e feminina da categoría Infantil. Trátase dun dos momentos máis esperados polos clubs, xa que moitos mozos vivirán aquí unha das súas primeiras experiencias nun campionato autonómico de longa distancia.
Pola tarde chegará o prato forte da competición cos 3.000 metros libres, tanto masculinos como femininos, nas categorías Júnior 1 (2009–2010), Júnior 2 (2007–2008) e Sénior (2006 e anteriores). Unha proba esixente, nadada contra o reloxo, que porá a proba a resistencia e estratexia dos participantes.
O Concello de Pontevedra acolleu este martes a presentación oficial do campionato. A concelleira de Deportes, Anabel Gulías, felicitou os organizadores e expresou o seu desexo de que o Galaico "cumpra coas expectativas, cada vez máis altas".
Pola súa banda, o vicepresidente da Deputación, Rafa Domínguez, puxo en valor o "enorme traballo" detrás dun evento que contribúe tanto ao impacto económico na cidade como á proxección da súa imaxe.
O presidente da FEGAN, Juan Carlos Brión, lembrou que esta proba é selectiva para o Campionato de España de Longa Distancia, e destacou que Pontevedra reunirá "os mellores fondistas de Galicia", aínda que con "pequenas ausencias" destacadas, como as dos medallistas nacionais Paula Otero e Mateo García.
Brión salientou tamén o incremento da participación: 14 deportistas máis que o ano pasado.
O presidente do Club Galaico, Alberto Castro, subliñou que se trata dunha cita "moi especial", xa que o club é o vixente campión autonómico de longa distancia, tras vencer o pasado ano en Ponte Muíños co equipo absoluto. Castro explicou que, malia tratarse dun campionato máis no seu calendario organizativo, desta volta "van estar un pouco máis cómodos" pola estrutura e características da piscina.
A instalación de Ponte Muíños conta con rúas de 2,5 metros de ancho, unha dimensión superior á habitual, que adoita ser de 1,80 metros. Esta amplitude permite que na competición poidan nadar dous deportistas por cada rúa, facilitando o desenvolvemento dunha proba sempre complexa pola súa duración.
Coa participación confirmada de 53 homes e 45 mulleres, o Campionato Galego de Longa Distancia preséntase como unha das citas referenciais do calendario autonómico e un escaparate perfecto para medir o talento e a progresión da natación galega.
Como marca o regulamento, só poderán competir dous nadadores por estaxe, e o sistema de puntuación limitará tamén a dous por club os deportistas que sumen puntos en cada proba. Os 16 primeiros clasificados obterán puntuación, corréndose a lista cara abaixo para evitar duplicidades entre membros dun mesmo equipo.
A representación dos clubs será diversa, cun cartel no que figuran entidades de todas as provincias: Pabellón Ourense, Sporting Casino, Fluvial de Lugo, Xove, Ferrol, Vigo Rías Baixas, Riveira, Cedeira, Ponteareas, Arteixo, Portamiñá Lugo, Liceo, Cidade de Santiago, Culleredo, Ordes e, como anfitrión, o Galaico de Pontevedra.