O Concello de Ribadumia presentou este venres a quinta edición do Rallymix Concello de Ribadumia, unha proba que se celebrará os días 24, 25 e 26 de xullo e que volverá converter o municipio nun dos principais escenarios do automobilismo galego.
O acto de presentación contou coa presenza do alcalde de Ribadumia, David Castro; o portavoz da Escudería DesguacesTino Racing, Pablo Iglesias; o presidente da Federación Galega de Automobilismo, Antonio Rodríguez Troitiño; o deputado provincial, Javier Tourís; o xefe do Servizo de Deportes da Xunta en Pontevedra, Daniel Benavides Alonso; e o concelleiro de Deportes de Meis, Manuel Muñoz.
Durante o acto déronse a coñecer os principais detalles dunha competición que contará cun tramo cronometrado de 13,5 quilómetros sobre pistas de terra e asfalto pechadas ao tráfico.
Ademais, a organización repartirá 6.350 euros en premios entre as diferentes categorías participantes.
Organizado pola Escudería Desguaces Tino Racing, o Rallymix volverá reunir en Ribadumia a pilotos e afeccionados do motor, ofrecendo un formato caracterizado pola espectacularidade e a proximidade entre os participantes e o público.
A quinta edición terá ademais un marcado compoñente emotivo coa celebración do IV Memorial Esteban Pérez Iglesias e do III Memorial Bárbara Gómez Oubel.
Son dúas homenaxes cos que a organización pretende manter vivo o recordo de dúas persoas moi vinculadas ao automobilismo e á escudería, pondo en valor principios como o respecto, a confianza e a superación.
Un espírito de superación que estará representado polo regreso á competición de Tinín Igrexas, que volverá porse ao volante dun Ford Festa N5 despois de tres anos de recuperación. A súa volta á competición será un dos momentos máis especiais desta edición.
Durante o acto, a Escudería Desguaces Tino Racing agradeceu o apoio das administracións, as empresas patrocinadoras e todas as persoas colaboradoras que fan posible a celebración da proba
Pola súa banda, o alcalde destacou a colaboración institucional e o impacto que o Rallymix ten tanto na promoción de Ribadumia e Meis como na dinamización económica e social de ambos os municipios durante o fin de semana de competición.
Engade Pontevedra Viva como fonte preferida de Google de balde
Mantente informado coas últimas noticias de actualidade.