Espectáculo sobre o asfalto no VIII Rallye de Pontevedra

O mundo do motor gozou nesta oitava edición dun Rallye de Pontevedra de máxima igualdade que deixou grandes momentos en cada tramo da competición.

Foi unha xornada de sábado marcada polo gran ambiente vivido en todas as estradas que acolleron esta proba do Campionato Xunta de Galicia de Rallyes. Os pilotos entregáronse ao máximo nunha edición que coroou como campións ao dúo formado por Dani Berdomás e Brais Mirón.

A bordo do seu Citroën C3 Rally2, os pilotos de JRT Motorsport fixeron boa a regularidade mostrada ao longo de todos os tramos cun tempo acumulado de 1:00:47.7, once segundos máis rápidos que os seus principais perseguidores Jorge Cagiao e Javier Martínez cuxa estrea co Toyota GR Yaris Rally2 saldouse cun meritorio segundo posto.

Pecharon o podio Alberto Meira e Avelino Martínez, que se manteñen inmersos na loita polo título do campionato autonómico tras terminar nunha valiosa terceira posición a unha distancia de 1:19.8 respecto ao primeiro posto.

A proba arrancou á primeira hora en Cerdedo-Cotobade, un tramo técnico e veloz con certas modificacións respecto da pasada edición. Jorge Cagiao e Javier Martínez souberon adaptarse mellor que ninguén ás exixentes condicións do trazado tras asinar o mellor tempo até o momento (10:02:0).

Avanzou a competición cara a unha das partes crave da xornada, o tramo de 18 quilómetros de Moraña-Barro.

Daniel Berdomás presentou candidatura a alzarse vencedor tras rexistrar o mellor tempo (11:08:0) e colocarse como primeiro clasificado por encima dun Iván Ares que mellorou as súas prestacións respecto ao tramo inicial.

Tras unha parada no parque de asistencia do campo de fútbol de Baltar, en Portonovo, os pilotos afrontaron o segundo paso polo tramo de Cerdedo-Cotobade.

A igualdade na clasificación entre Dani Berdomás e Iván Ares aumentou máis aínda xa que ambos completaron o percorrido no mesmo tempo (9:40:9).

Un accidente no paso por Sanxenxo-Meaño durante a tarde obrigou á dirección de carreira a decretar a neutralización do tramo e avanzar cara ao tramo de Moraña-Barro.

O desempeño dos pilotos non deixou grandes cambios na clasificación, polo que todo se decidiu na última parte da competición.

Resultou decisivo, por tanto, o segundo paso por Sanxenxo-Meaño que arrancou sobre as 19:30 da tarde e que coroou como vencedor da competición a Dani Berdomás e Brais Mirón tras ser os máis regulares nos seis tramos disputados.

Aínda que Jorge Cagiao e Javier Martínez recortaron distancias neste último tramo, non foi suficiente para asaltar o liderado e abandonar a segunda praza de podio. Alberto Meira e Avelino Martínez aseguráronse o terceiro posto cun tempo de 9:38.7 no último percorrido da proba.

A maior sorpresa da xornada foi a brusca caída na táboa de Iván Ares e Borja Rozada tras sufrir unha gran perda de tempo pola súa saída de pista no cuarto tramo. Este feito, sumado a unha dura penalización, levoulles a terminar o campionato a case 22 minutos do primeiro posto.

Finalizou así unha nova edición do Rallye de Pontevedra que reafirmou a enorme paixón que levanta o motor na comarca. Éxito tanto dentro como fóra das estradas nunha xornada na que se puido gozar do espectáculo automobilístico.