O adestrador do Pontevedra Club de Fútbol, Rubén Domínguez, transmitiu unha mestura de orgullo y emoción tras a vitoria por 2-1 ante o Racing de Ferrol.
Trátase dun triunfo que, ademais de dar inicio ao 2026 da mellor das maneiras, supón un paso de xigante á hora de conseguir o obxectivo de manter a categoría. "É unha sensación moi chula por varias cousas. Unha, por consolidar, que igual non somos conscientes de que conseguimos dous terzos do obxectivo en menos de media tempada", destacou o técnico na sala de prensa.
Para Domínguez, o triunfo ante o Racing ten un valor especial, tanto polo rival como polo ambiente que se viviu en Pasarón. "Se queremos soñar, a cidade ten que responder como respondeu hoxe. Soportámonos grazas á xente, grazas ao traballo do equipo, pero grazas á xente. Así que convido a toda Pontevedra que se suba ao carro dunha vez, porque os imos a necesitar se queremos facer un camiño tan bonito como o que estamos a construír", subliñou.
O adestrador granate insistiu tamén en manter a prudencia pese ao gran momento do equipo. "Non coñezo ningún equipo que se salvara con 30 puntos nesta categoría. Son dous terzos do obxectivo e quédannos 15. Temos que seguir traballando, cos pés no chan, porque o día que non esteamos ao máximo, non imos gañar fácil", advertiu.
Domínguez tamén encomiou o espírito do seu plantel, baseado en "o esforzo e a solidariedade. A palabra equipo queda curta, porque é unha pasada como compiten, como gozan defendendo e nas accións de balón parado", aínda que recoñeceu que ante o conxunto ferrolán "non fomos capaces de combinar moito, un pouquiño polo bo traballo do rival e tamén por como estaba o campo". A pesar diso, valorou a capacidade dos seus xogadores para adaptarse "a tres sistemas diferentes".
A cruz ao partido puxérona as lesións de Álex González e Alain Ribeiro. A do capitán "non ten boa pinta, porque case lle cabe un dedo na coxa. Ten pinta de rotura, e Alain non se sabe si foi unha picada ou rotura", sinalou Domínguez, quen explicou que, polo momento, o equipo está a ter sorte coas amarelas "porque están a caer salteadas".
Sobre o ambiente en Pasarón, Domínguez deixou claro que foi mérito do "que construíu o equipo en todo este camiño. Esperemos que isto só sexa o inicio dun ano súper ilusionante, que a xente crea e se ilusione con este Pontevedra".
Finalmente, o adestrador granate tivo palabras para os seus porteiros, Marqueta e Edu Sousa, "dous grandísimos porteiros. Un alégrase do outro, non hai competencia negativa. É un luxo e un orgullo telos. Un, lenda do Pontevedra".
Respecto ao mercado invernal, Domínguez mostrouse cauto aínda que coa clara intención de reforzar o equipo. "Tentaremos fichar xogadores que nos melloren, pero non sei que imos poder asinar, porque hai unha competencia terrible. Imos terceiros cun orzamento que se comparades…".