A Sociedad Gimnástica de Pontevedra xa coñece o camiño que lle espera aos seus equipos no Campionato de España de Clubs División de Honra e Primeira División.
A Real Federación Española de Atletismo deu a coñecer a composición da primeira xornada das ligas nacionais, nas que o equipo pontevedrés repetirá na máxima categoría masculina e aspira a crecer na Primeira División Feminina.
No que respecta á División de Honra Masculina, a Gimnástica estrearase en Salamanca co primeiro obxectivo de tentar asegurar a súa permanencia sen excesivo sufrimento.
Os seus rivais na xornada inaugural serán o Atletismo Albacete, Unicaja Jaen Paraíso Interior e o club anfitrión, o Atlético Salamanca.
Pola súa banda na Primeira División Feminina, o equipo pontevedrés deberá desprazarse menos quilómetros.
Non sairá de Galicia, xa que o seu primeiro encontro terá lugar no Complexo Monterrey do municipio ourensán de Pereiro de Aguiar.
Neste caso mediranse ao Club Atletismo Ourense, Atletismo Feminino Celta e o Barrutia A.E.
En ambos os dous casos os encontros da primeira xornada das ligas nacionais disputaranse o sábado 25 de abril entre as 17.00 e as 20.45 horas.