Aínda non empezou oficialmente a liga en Segunda RFEF pero o Pontevedra Club de Fútbol xa mira de esguello cara á segunda xornada de competición, que supoñerá o seu primeiro desprazamento do curso.
O club granate quere estar acompañado polos seus afeccionados fronte á SD Compostela no santiagués Estadio Vero Boquete San Lázaro, o vindeiro domingo 8 de setembro (17.00 horas).
Repetir a imaxe do masivo desprazamento da pasada campaña, co ascenso en xogo, será difícil, pero confían desde a Boa Vila en que sexan moitos os afeccionados que se despracen a apoiar o equipo na capital galega.
As entradas para este partido poderán retirarse fisicamente ata o xoves día 5 de setembro nas oficinas de Pasarón ou a través da plataforma en liña da SD Compostela, sendo a zona reservada para os seguidores pontevedreses os sectores 2 e 3 da bancada de Preferencia. O prezo das mesmas será de 15 euros para o público adulto (desde os 17 anos), de 5 euros para os menores de 0 a 16 anos, ou de 10 euros para os posuidores do Carné Xove.
Ademais o Pontevedra habilitou unha viaxe organizada en autocar para os seguidores que o desexen, cunha expedición que partirá o mesmo día do partido ás 15.00 horas desde o Pavillón Municipal dos Deportes. Neste caso o prezo (viaxe + entrada) fixouse en 25 euros, 15 euros para os menores de 16 anos.
MAREA GRANATE | Primeiro desprazamento da da tempada
— Pontevedra CF (@PontevedraCFSAD) August 27, 2024
Ven connosco a Santiago para alentar ao Pontevedra CF
Reserva de prazas para o autobús e venda de entradas soltas nas oficinas de Pasarón ata o xoves 5 ás 12:00 #NonPararAtaVoltar pic.twitter.com/SBcYq1xb7c
Engade Pontevedra Viva como fonte preferida de Google de balde
Mantente informado coas últimas noticias de actualidade.