En maio de 2024 Lucía Rivas proclamábase campioa de Europa coa Selección Española Sub-17, pero uns meses despois unha grave lesión de xeonllo truncaba a súa progresión.
Con todo nin unha rotura do ligamento cruzado do seu xeonllo puido coas súas ganas e afán de superación, e xa plenamente recuperada segue a dar pasos cara á elite do fútbol.
A caldense debutou esta tempada co Real Club Deportivo na Liga F.
Na máxima categoría nacional suma xa 9 partidos, 4 deles de titular, con 1 gol.
Ese desempeño volveulle a abrir as portas das categorías inferiores da Selección Española.
En concreto a xogadora formada no Atlético Cuntis, antes de dar o salto ao Deportivo, foi chamada polo combinado nacional Sub-19 para unhas xornadas nas que se prepararán para a Rolda 2 de clasificación ao Europeo.
Lucía deberá concentrarse o luns 30 de marzo e até o mércores 1 de abril en Las Rozas.
Serán unhas xornadas nas que España preparará os seus próximos encontros ante Hungría (12 de abril), Irlanda do Norte (15 de abril) e Portugal (18 de abril) cun billete para a fase final da cita continental en xogo.