Xa está en marcha a Semana Galega da Vela 2026, que celebrou a súa xornada inaugural este venres nas augas da Ría de Arousa coas clases Optimist, ILCA 4 e 420 como protagonistas.
Por ese mesma orde saíron á auga de maneira graduada as embarcacións en cada unha das tres mangas validadas polo Comité dirixido pola Oficial Principal, a vilagarciá Loli Camba.
Estas tres probas deixaron como líder da Clase Optimist Sub 16 ao portugués André Sa, do Sporting Club de Aveiro. Outra lusa como é Joana Santos impúxose na categoría feminina.
En canto ás categorías Sub 13, Martín Barros gobernou coa mellor actuación da xornada representando o Monte Real Club de Iates de Bayona.
De igual maneira impúxose Aroa Pérez, do Real Club Náutico de Sanxenxo, na categoría feminina.
Houbo protagonismo vigués nos ILCA 4, pois Alejandro Pérez, do Real Club Náutico de Vigo, púxose á fronte da clasificación con 3 puntos tras levar as tres mangas. Séguenlle Roque González-Llanos, tamén do náutico vigués, e Brais Amoedo, do Monte Real Club de Iates de Bayona.
Pecharon a xornada inaugural nas augas arousás os 420. O tándem formado por Luís Wizner e Celia De La Fuente sitúase á fronte da clasificación por diante de Paco Riveras e Gonzalo Silveira, segundos; e de Bruno Maure e Javier Ríos, terceiros.
A competición, que está organizada pola Real Federación Galega de Vela, estenderase até o vindeiro domingo e celebrará a súa segunda cita este mesmo sábado co aliciente dos clase Snipe, que na súa categoría xuvenil xóganse a clasificación para o campionato do mundo.