Só un combate puido gozar Sergio Troitiño no Campionato do Mundo de Taekwondo que se está a disputar en Wuxi, China.
O deportista do Mat's de Marín acudía con esperanzas á gran competición internacional, pero non tivo fortuna desde o sorteo do cadro.
Troitiño debía debutar nos 1/32 de final fronte a todo un medallista olímpico, o xordano Saleh Elsharabaty, prata en Tokyo 2021 aínda que nunha categoría inferior, a de -80 quilos.
Nesta ocasión ambos os dous vían as caras en -87 quilos.
Un representante xordano que foi o que marcou a pauta do combate, e aínda que no inicio da segunda manga foi Sergio Troitiño o que se puxo por diante o resultado terminou sendo claro, de 10-23 e 6-12 na súa contra.
Troitiño é o segundo deportista do Mat's que entra en competición no Mundial, tras os oitavos de final alcanzados por Iván García, pero non o último.
Aínda lle falta entrar en acción a Arlet Ortiz, na categoría de -62 quilos.
No seu caso afrontará o desafío mundialista o vindeiro mércores 29 de outubro.