O ano que termina, 2017, deixará pegada na porteira internacional do Poio Pescamar, Silvia Aguete, como un dos mellores da súa carreira deportiva. Ademais dos éxitos conseguidos defendendo ao equipo " rojillo", Silvia parece consolidar o seu posto na selección española de fútbol sala feminino, coa que se proclamou campioa do Torneo IV Nacións, competindo con Rusia, Italia e Portugal e sendo titular en dous dos tres encontros disputados.
O brillante colofón de ano chégalle agora, ao resultar nomeada nos premios Umbro futsal awards 17, nos que se recoñece aos mellores adestradores, xogadores e xogadoras do mundo e nos que Silvia Aguete forma parte dun selecto grupo de 10 porteiras, que optan a ser nomeadas mellor porteira do mundo.
Nesa lista, Silvia terá como rivais a outra porteira dun equipo español, Estela García, que milita no vixente campión de liga, Atlético de Madrid, así como a Ana Catarina (Benfica), Bianca (Cianorte-Brasil), Giga (Chapecó-Brasil), Ivanova (San Petersburg-Rusia), Kamolrat (Bangkok-Thailandia), Mascia (Ternana-Italia), "Naty" Silva (Sporting-Portugal) e Regi (Sao Bernardo-Brasil).