A representación galega no Campionato de Europa Júnior e Sub-23 de Sprint que se celebra en Pitesti (Romanía) deu un paso á fronte na segunda xornada de competición, con Silvia Gago e Claudia Couto como grandes protagonistas tras asegurar a súa presenza nas finais do domingo.
Gago, do Náutico O Muiño de Ribadumia, protagonizou unha das actuacións máis destacadas da delegación española ao imporse con autoridade na súa semifinal de C1 500 metros en categoría júnior.
A padeeira dominou a proba de principio a fin, marcando un tempo de 2:20.235 que lle permitiu superar a portuguesa Lara Lopes (2:21.055) e á alemá Selina Gerchel (2:23.988).
A final onde participará Gago está programada para o domingo 6 de xullo ás 08:30 hora española, e nela a galega terá a oportunidade de loitar por unha medalla continental.
Pola súa banda, Claudia Couto, da Escola de Piragüismo Cidade de Pontevedra, tamén asegurou a súa presenza na loita polas medallas ao finalizar terceira na súa eliminatoria de C1 200 metros sub-23.
A pontevedresa rexistrou un tempo de 49.056, nunha serie dominada pola ucraína Iryna Fedoriv (47.412) e a francesa Chloé Nicot (47.869). A súa final disputarase o domingo ás 08:35 hora española.
O éxito galego completouse coa destacada actuación do K4 500 metros júnior masculino, onde o padeeiro do Club de Mar Ría de Aldán, Miguel Blanco, xunto aos seus compañeiros Gonzalo Granados, Borja López e Jaime López, impúxose con autoridade na súa semifinal cun tempo de 1:26.082, superando ás embarcacións de Alemaña (1:27.750) e Polonia (1:27.776).
Tamén mantén as súas opcións Manuel Pousa (Club de Mar Ría de Aldán), quen logrou o pase ás semifinais en K1 200 metros sub-23 tras finalizar terceiro na súa serie eliminatoria cun tempo de 37.720. O galego competirá este sábado 5 de xullo ás 14:40 hora española por un posto na final.