Só pasaron uns días desde o final da tempada para o Poio Pescamar, coa súa eliminación nos cuartos de final da Copa de España, pero o cadro vermello non malgastou o tempo e púxose a traballar no seu novo proxecto deportivo.
Xa sen Marcio Santos no club, a etapa de Dani Díaz no banco arrincou con tres renovacións importantes.
O club presidido por Juanjo García, que aspira a dar un subir un chanzo máis e pelexar polos postos de honra na Primeira División, confirmou a continuidade de tres dos puntais do equipo como Silvia Aguete, Jenny Lores e Ale de Paz.
No caso da gardameta internacional, a súa renovación supoñerá afrontar a quinta tempada no equipo, do mesmo xeito que a capitá Jenny Lores, mentres que Ale de Paz afrontará o seu cuarto curso no club da Seca.