O bombo do que sairá o rival do Pontevedra Club de Fútbol na eliminatoria de campións polo ascenso está case decidido, á espera de coñecer o desenlace dos grupos balear e manchego, os únicos que seguen no aire.
Á lista de oito equipos que eran matematicamente primeiros do seu grupo e na que se encontraban os granates xunto a Castellón, Linares, Mérida, Algeciras, Laredo, Arandina e Peña Sport, sumáronse o pasado fin de semana oito novos clubs.
Así, a nómina de rivais a analizar por Luisito e o seu equipo técnico ampliouse co Condal (Grupo 2), Portugalete (Grupo 4), Ascó (Grupo 5), Rayo Majadahonda (Grupo 7), Mensajeiro (Grupo 12), Jumilla (Grupo 13), Varea (Grupo 16) e Ebro (Grupo 17).
Nesta relación de rivais destaca a presenza do Portugalete vasco, equipo que se enfrontou a pasada campaña ao Pontevedra na primeira eliminatoria do play-off.
Con respecto aos grupos que aínda non están decididos, o manchego (Grupo 18) está comandado a falta dun partido polo Talavera con 81 puntos, tendo como único opoñente o Almansa con 79.
Pola súa banda no grupo balear (Grupo 11) viviuse esta fin de semana un xiro co Peña Deportiva, equipo do ex-granate Kevin Levis, ascendendo á primeira praza provisional con 72 puntos, seguido agora polo Formentera con 70 e o anterior líder, o Llosetense, con 69.