O Arosa consolídase no liderado do Grupo B da Terceira División despois do seu claro triunfo este sábado no estadio vigués do Baltasar Pujales, fronte ao Rápido de Bouzas.
Os de Rafa Sáez mostraron a súa solidez e pegada para impoñerse por 0 goles a 2 e sumar o seu terceiro triunfo consecutivo en liga, que lles coloca con 18 puntos mantendo os 2 de vantaxe co Arenteiro pero ampliando a 5 puntos a renda coa cuarta posición.
O conxunto arlequinado saíu disposto a impoñer o seu xogo en Bouzas, e só tardou 23 minutos en adiantarse cun gol de Javi Otero.
Aínda que tentaron reaccionar os locais, xusto antes do descanso Róber facía o segundo do Arosa encarrilando o duelo. Foi un duro golpe para o Rápido, que na segunda metade non conseguiu reducir a súa desvantaxe ante o bo facer defensivo dos de Vilagarcía.
Consulta a acta do Rápido de Bouzas-Arosa.
TRIUNFO DO RIBADUMIA
Importante vitoria a conseguida tamén polo Ribadumia, poñendo fin así a unha mala serie de cinco xornadas sen conseguir gañar.
Os de Luís Carro acabaron con esa estatística non sen sufrimento, cun traballado triunfo fronte ao pechacancelas da competición, o Pontellas, na Senra (1-0).
Tanto lle custou aos aurinegros que despois de 90 minutos de pelexa e intensidade, non foi ata o tempo de desconto cando chegou o gol decisivo, obra de Fran Fandiño.
A vitoria, festexada con rabia na Senra, permite ao Ribadumia escalar posicións e situarse na sexta praza da táboa con 11 puntos.