Saída inesperada no Arosa, que anunciou a baixa dun dos futbolistas que era fixo ata agora nas aliñacións de Jorge Otero.
Trátase de Suso Martínez, quen rescinde a súa vinculación co club de Vilagarcía de mutuo acordo e por "motivos persoais", informou este venres a entidade arlequinada.
O lateral zurdo só se perdeu ata a data dous encontros na presente liga, nas xornadas 2 e 19, partindo sempre no once inicial e completando os 90 minutos desde a terceira xornada de competición.
Coa súa saída o Arosa valorará agora acudir ao mercado para reforzar a liña defensiva pensando nun segundo tramo de competición no que aspira a recortar os sete puntos de desvantaxe que ten actualmente coa zona de play-off de ascenso, para tentar loitar por estar entre os catro primeiros a final de liga.
Os arlequinados anunciaron a saída de Suso a dous días de enfrontarse na Lomba (domingo, 17:00 horas) ao Negreira.