A sexta edición da Gladiator Race de Pontevedra non poderá celebrarse tal e como estaba previsto os días 6 e 7 de xuño na Illa das Esculturas.
Aínda que era un anuncio case xa esperado tras o calendario de desescalada anunciado polo Goberno, a organización da popular proba de obstáculos confirmou este xoves a súa decisión.
"Estamos a valorar opcións para este ano, a propósito que non será fácil aínda así a organización dunha proba desta dimensión, ou directamente pospoñela a 2021", explicaron nun breve comunicado.
Comunicada a cancelación, polo menos na data prevista inicialmente, a Gladiator Race pide "uns días" para valorar que decisión tomar.
A proba, que en 2019 congregou máis de 1.700 pontevedreses, contaba xa con máis de medio milleiro de deportistas anotados.