A tempada vai camiño de ser histórica para o Team Farto.
O equipo feminino pontevedrés vén de ser un dos grandes protagonistas da Volta a Castela-A Mancha, cunha actuación que o disparou no ranking nacional.
Coa súa ciclista Agua Marina Espínola o Farto sumou un triunfo parcial na última etapa da rolda manchega e tamén levou a clasificación xeral.
Ademais a escuadra galega impúxose na clasificación por equipos, por puntos e na montaña, neste último caso por medio de Alessia Missiaggia.
Con este resultado o Farto vaise, na actualización deste luns 25 de agosto, ata os 1.138 puntos no ranking nacional, sendo o segundo mellor equipo do ano ata o momento só superado polo Massi Baix Ter (1.473 puntos).
Tamén segunda se situou a nivel individual a propia Agua Marina Espínola (604 puntos) subindo seis posicións, e xa só por detrás de Marlen Reusser do Movistar Team (651 puntos).
Non é pouca cousa, e é que se trata da actual subcampioa do Giro de Italia e da Volta Ciclista España.
Tras esta cita o Team Farto mira agora cara a un triplo obxectivo no mes de setembro, no tramo final da súa tempada.
Por unha banda ten previsto participar en dúas voltas profesionais por etapas en Italia, como son o Giro della Toscana (4 ao 7 de setembro) e o Giro Mediterraneo in Rosa (19 ao 21), ao que se suma o Campionato Galego de Fondo que terá lugar en Sanxenxo o 7 de setembro.