Por segunda vez na súa carreira Tere Abelleira foi convocada pola Selección Española de Fútbol.
A futbolista pontevedresa, que foi citada no mes de setembro por primeira vez para o partido de España ante Moldavia pero sen chegar a debutar, terá agora unha nova oportunidade para estrearse.
Nesta ocasión a centrocampista do Real Madrid foi incluída na lista de 23 futbolistas que competirán o próximo 23 de outubro (21.00 horas) no estadio sevillano da Cartuxa fronte á República Checa en encontro clasificatorio para a Eurocopa de 2022.
Trátase ademais dun duelo que "é clave e importantísimo para a clasificación para a Eurocopa", sinalou o técnico nacional, Jorge Vilda, na rolda de prensa que deste martes na que desvelou a convocatoria da Selección, e é que "o equipo que gañe este partido terá o camiño moi achandado para conseguir a primeira praza e a clasificación directa", explicou.
Vilda: "El equipo que gane en el España-República Checa tendrá el camino muy allanado para obtener el primer puesto y la clasificación para la Eurocopa".#JugarLucharYGanar pic.twitter.com/Pu0nshtOtS
— Selección Española Femenina de Fútbol (@SeFutbolFem) October 13, 2020
As xogadoras seleccionadas concentraranse en Madrid o vindeiro luns 19 de outubro, segundo informa a Real Federación Española de Fútbol.
Xunto a Abelleira, completan a lista as gardametas Lola Gallardo e Sun Quiñones; as defensoras María Alharilla, Irene Paredes, María León, Ivana Andrés, Andrea Pereira, Marta Corredera, Ainhoa Vicente e Eunate Arraiza; as centrocampistas Alexia Putellas, Patri Guijarro, Aitana Bonmatí, Amanda Sampedro e Irene Guerrero; e as dianteiras Jennifer Hermoso, Lucía García, Mariona Caldentey, Marta Cardona, Eva Navarro e Nerea Eizagirre.