Dura derrota a sufrida este sábado pola Sociedad Deportiva Teucro na pista do Balonmán Lalín (34-22).
Os pontevedreses acentúan a súa crise de resultados, e tras caer a semana anterior fronte ao pechacancelas volveron a ceder cun equipo da parte media baixa da táboa afastándose definitivamente dos postos de honra da categoría.
De novo un mal inicio condenou os azuis, que saltaron á pista e atopáronse cun parcial de 3-0 de saída do seu rival.
Tardaron de feito máis de 5 minutos en anotar o seu primeiro tanto, cun gol de Daniel Vicente Pintus, e aínda que pareceron reacciolnar tras un tempo morto da súa adestradora chegando a colocarse 6-4, o Lalín seguiu dominando e chegou a meter cinco goles consecutivos para empezar a decantar o choque (12-5) no minuto 18.
Nada funcionaba no Teucro, superado en defensa e errático en ataque, e o resultado ao descanso era xa un contundente 16-9.
A renda en favor dos locais chegou ás 11 tantos ao comezo do segundo acto (23-12), suficiente para que o Lalín controlase a partir de aí os intentos de reacción pontevedresa.
Foron pasando así os minutos sen opción á sorpresa para finalizar cun claro resultado de 34-22 que deixa ao Teucro moi tocado.
Con 16 puntos en 13 partidos, os azuis perden corda coa parte alta da clasificación de Primeira Nacional.