deportes

Tono Campos pecha a súa participación no europeo con outro ouro

Pontevedra
31 de xullo 2022
Almu Dapena

Non pasaron nin 24 horas e Tono Campos conseguiu o seu segundo ouro no campionato de Europa de maratón que se está disputando na localidade danesa de Silkebrog, pechando así a súa participación con dúas medallas de ouro e unha de bronce

Tono Campos (segundo), con Diego Romero, Fernando Busto e Diego Miguéns
Tono Campos (segundo), con Diego Romero, Fernando Busto e Diego Miguéns / FEGAPI

Non pasaron nin 24 horas e Tono Campos conseguiu o seu segundo ouro no campionato de Europa de maratón que se está disputando na localidade danesa de Silkebrog, pechando así a súa participación con dúas medallas de ouro e unha de bronce.

Nesta ocasión, o grovense subíase á canoa con Diego Romero ao redor das 8:30 horas para seguir facendo historia do piragüismo. Unha vez comezada a carreira do C2 sénior, a embarcación logrou manterse na cabeza en todo momento, acompañado, iso si, da dupla polaca e da española, formada por Fernando Busto e Diego Miguéns.

Con todo, o paso dos quilómetros e o cansazo foise facendo notar nos brazos dos padeeiros, que aos poucos foron baixando o ritmo sen ser capaces de manter o listón de Campos e Romero, que chegaron aos últimos 500 metros xunto á embarcación polaca, á que superaron nun longo sprint para parar o cronómetro nun tempo de 01:59:24.82.

Os polacos Mateusz Zuchora e Mateusz B chegaron 10 segundos por detrás mentres que os padeeiros de Catoira Fernando Busto e Diego Miguéns, que debutaban nunha cita internacional, chegaron terceiros a 00:01:22.95.

Con esta medalla, Tono Campos suma un metal máis na súa dilatada carreira como especialista en maratón e xa son 12 medallas en campionatos de Europa (tres conseguidas esta semana) e 20 en mundiais.

Máis novidades