A Sociedad Deportiva Teucro comezou o ano da mellor maneira posible.
Na estrea de Sergio Carballeira como adestrador, o conxunto pontevedrés impúxose no Porriño por 24-28, nun encontro no que soubo administrar a súa vantaxe inicial e resistir os momentos críticos da segunda metade.
O choque non puido ter mellor arranque para o equipo lerezano, que saltou á cancha con intensidade e asinou un parcial de 2-6 que obrigou ao preparador local a pedir o primeiro tempo morto. A pausa non serviu para frear a inercia visitante e Pintus ampliou a distancia anotando o 2-7.
A pesar da ampla renda inicial, o Porriño, necesitado de puntos logrou reducir diferenzas ata o 10-13 no minuto 23 de xogo.
Con todo, o que parecía un simulacro de remonta, quedou nun simple intento. Aproveitando unha superioridade numérica pola exclusión de David Costa, os azuis responderon por medio de Roi e Ricardo González, e marcháronse ao descanso cun cómodo 11-17.
Na continuación o duelo mantivo un ritmo equilibrado, con intercambio de goles en ambas as portarías ata que unha serie de erros por parte do conxunto local, un deles desde o sete metros, permitiu ao Teucro volver estirar a distancia ata o 14-22 no minuto 40, a súa máxima vantaxe do partido.
O Porriño, con todo, non se rendeu. Martín Rodríguez e Xosé Canedo lideraron un parcial de 2-0 que provocou o tempo morto visitante (16-22).
A partir de aí, o Teucro entrou na súa peor fase do encontro e estivo máis de sete minutos sen anotar, situación que o seu rival aproveitou para volver apertar o marcador (22-24).
Pero cando máis apertaban os locais, Ricardo González apareceu para romper a seca e asinar o 22-25 que deu osíxeno aos seus. O Teucro recuperou o control do xogo nos minutos finais e pechou a súa vitoria por 24-28, asegurando os dous primeiros puntos do ano na estrea de Sergio Carballeira no banco.
Consulta as estatísticas neste enlace