O Circuíto de Carreiras Populares de Pontevedra prepara novidades para a que será a súa quinta edición.
Ademais das probas tradicionais e consolidadas xa no calendario deportivo da cidade, en 2017 a cidade de Lérez acollerá un trail urbano nocturno.
Tras celebrar a súa primeira edición en novembro na Eurocidade Valença-Tui, a carreira Urban Trail Night organizada por Qualité Sport Events en colaboración co Concello de Pontevedra disputarase na cidade de Lérez o día 4 de marzo.
Serán 14 quilómetros de percorrido por distintas zonas da cidade, desde o centro histórico á beira do Lérez alternando tramos de asfalto, terra, beirarrúas e parques, a partir das 20:00 horas, polo que será obrigatorio participar con luz frontal, segundo desvelou a organzación.
O evento incluirá ademais unha andaina popular de 10 quilómetros.
As inscricións da Urban Trail Night de Pontevedra habilitaranse a mediados do mes de xaneiro na web oficial do evento, www.urbantrailnight.com.