Pontevedra uniuse este sábado pola diabetes. Unhas oitocentas persoas participaron na cuarta edición da milla urbana solidaria organizada pola Asociación Anedia con motivo do Día Mundial da Diabetes.
Nenos e adultos participaron nesta proba deportiva portando roupa de cor azul, co que se identifica a concienciación sobre esta enfermidade.
Por primeira vez, o circuíto da Alameda de Pontevedra estivo homologado pola Real Federación Española de Atletismo, o que dá validez ás marcas que se obtiveron.
Desde primeira hora da tarde fóronse sucedendo as diferentes carreiras, concluíndo coa milla popular e a competición federada.
Ademais, a xornada incluíu tamén unha exhibición de ximnasia a cargo do Club Treboada.
Os actos polo Día Mundial da Diabetes continuarán os próximos días.
Así, o luns iluminarase de azul o edificio do Concello de Pontevedra na Praza de España, coa actuación do grupo de gaitas Retrouso de Cela ás 19:00 horas e un flashmob preparado por nenos e nenas da asociación ás 19:30 horas.
O martes 14 realizaranse actividades nos comedores escolares xestionados por Arume e celebrarase unha charla ás 19:00 horas na Casa Azul co título 'Como afrontar a diabetes na adolescencia'.