Un dos eventos do ano en Pontevedra xa ten, finalmente, data de celebración. O Campionato de Europa de Piragüismo Maratón disputarase en augas do río Lérez do 28 de xuño ao 3 de xullo, segundo o acordado polas institucións que integrarán os diferentes comités organizativos, formados por representantes de Concello, Xunta, Deputación e a federacións galega e española de piragüismo.
Tras reunirse este luns no Concello, estableceuse que os días 28 e 29 de xuño queden reservados para a competición Master, na que poden participar os deportistas que o desexen sen límite de prazas por país, mentres a competición elite (senior, xuvenil e sub-23), disputarase os días 30 de xuño, 1, 2 e 3 de xullo, cun límite de dúas embarcacións por país e categoría.
En total competirán en Pontevedra representantes de 25 países, polo que se estima que a participación roldará a cifra dos 800 deportistas.
Ademais, para testar o circuíto deseñado no Lérez e diversos aspectos de organización, decidiuse celebrar unha competición previa "de nivel nacional", explicou o presidente da Federación Galega, Alfredo Bea, o Open Cidade de Pontevedra de Medio Maratón.
A intención con iso será correxir algúns detalles que se modificaron tras a celebración o pasado verán do Campionato de España de Piragüismo Maratón, e é que Pontevedra xógase moito co Europeo xa que, como recoñeceu o alcalde Miguel Anxo Fernández Lores, "conseguir que sexa un éxito nos pode permitir acceder non 2020 ao Campionato do Mundo", unha competición pola que a cidade de Lérez mostrou recentemente o seu interese enviando unha carta á Federación Internacional.