A 51 días de que o río Lérez se converta no centro do piragüismo continental, Pontevedra empeza a empaparse do espírito deportivo que traerá consigo o Campionato de Europa de Piragüismo Maratón.
A competición arrincará o próximo 28 de xuño, pero a cidade xa vive a que será o gran evento deportivo do ano tras o izado simbólico da bandeira do campionato.
O acto realizouse ante a ponte dos Tirantes con presenza de diversas autoridades e tamén deportistas como o pontevedrés Óscar Graña, que aspira a conseguir en casa un novo título europeo que sumar ao seu amplo palmarés nun "entorno como el de Pontevedra que es perfecto para este tipo de pruebas", sinalou.
Ao seu lado, o alcalde de Pontevedra, Miguel Anxo Fernández Lores, confirmou que o goberno local seguirá apostando por este tipo de eventos "porque a cidade préstase e goza das probas deportivas".
A anécdota do acto foi o susto dado polo presidente da Federación Galega de Piragüismo, Alfredo Bea, que se desmaiou debido a unha baixada de tensión. Foi atendido nun principio polo propio alcalde, médico de profesión, ata que se recuperou. Posteriormente pasou unha revisión médica nunha ambulancia do 061 antes de marchar polo seu propio pé.
O Campionato de Europa de Piragüismo Maratón encherá de actividade o tramo urbano do río Lérez do 28 de xuño ao 3 de xullo coa participación de preto de 800 padexeiros repartidos entre a categoría master e a elite.