O Pontevedra Club de Fútbol mira xa cara á que será a súa sexta saída do curso, a visita ao campo de Unionistas de Salamanca este próximo sábado 8 de novembro (18.00 horas) na undécima xornada do campionato.
Como todos os encontros nunha categoría igualada ao extremo, antóllase un duelo complicado para os granates, que ademais levarán consigo unha pequena laxa estadística.
Nunca até a data o Pontevedra impúxose en liga a Unionistas, un equipo que se converteu nunha particular besta negra para os da Boa Vila.
Desde a súa fundación en 2013, o equipo salmantino coincidiu tres tempadas cos granates, entre a antiga Segunda B e a Primeira RFEF. En total seis encontros disputáronse entre ambos os dous sen que se rexistrase ningún triunfo pontevedrés.
A estatística reflicte tres empates en Pasarón e tres derrotas en Salamanca, a primeira xogando aínda nas pistas do Helmántico na tempada 18-19, na que era a xornada inaugural da liga de Segunda B.
Tamén caería o Pontevedra na campaña 20-21 en Segunda B e na 22-23 en Primeira RFEF. Nas tres ocasiones ademais polo mesmo resultado de 1-0.
En Pasarón pola súa banda o tres partidos disputados acabaron 0-0, 1-1 e 1-1.
Claro que os números, números son, e pouco importarán unha vez empece a rodar o balón, como as cifras e traxectorias que ambos os dous equipos levan esta tempada.
Os de Rubén Domínguez chegarán ao encontro sétimos con 15 puntos, nunha situación óptima. Como visitante gañaron dous partidos (Ponferradina e Ourense), empataron un (Arenteiro) e perderon dous (Castilla e Bilbao Athletic).
Pola súa banda Unionistas, que arrincou o curso afundido con tres derrotas seguidas e que supuxeron de feito unha substitución no banco, encadea agora catro xornadas sen perder (dúas vitorias e dous empates) que lle fixeron saír, con 11 puntos, da zona de descenso, coa que aínda están empatados.