Por segunda vez esta tempada, os compromisos das seleccións nacionais nas coñecidas como 'xanelas FIBA' motivou o adiamento dun partido de liga do Club Baloncesto Arxil.
O equipo pontevedrés debía de recibir este fin de semana no Centro Galego de Tecnificación Deportiva o Azul Marino Mallorca Palma, actual sexto clasificado da Liga Feminina Challenge.
Con todo, de acordo co seu rival, o choque pospúxose.
No caso do Arxil ao afectarlle a convocatoria de dúas dos seus xogadores cos equipos nacionais do seu país.
Trátase de Nena Trajchevska con Macedonia do Norte e Raquel Laneiro con Portugal.
No caso de Trajchevska debe medirse coa súa selección a Ucraína e a Serbia, este último partido o domingo día 9, mentres que Laneiro enfrontarase aos mesmos equipos pero en orde inversa, dentro da fase de clasificación para o Eurobasket.
O partido entre Arxil e Mallorca fixouse finalmemte para o vindeiro mércores 19 de febreiro a partir das 20.30 horas no CGTD.
Antes de recuperar a xornada perdida, as verdes deberán visitar aínda o Adareva canario o vindeiro sábado 15 de febreiro.